أنا كافرة بكل شيء ينتهك خصوصيتي يعني حتى أمومتي مرتبطة في الشرع بنصي التحتاني.. إحنا إتوجعنا كتير قوي يا ريس
المحامي الكبير أستاذ معتز الدكر بعد ما شاف عذابي للحصول على حكم تطليق من المحكمة بعد خمس إنذارات طاعة و خيانة ٢ محاميين سابقين و حكم نشوز قرر إنه يرفع لي قضية جديدة بمستحقاتي بعد الطلاق ثأراً للبهدلة اللي إتبهدلتها السنين اللي فاتت عشان أكون حرة
و لإني ما بناقشوش وافقت مش بس عشان أشعر بجزء من التعويض نظير الإهانات اللي شوفتها . لا . كمان عشان بعد وفاة بابا في رفاهيات كتير ما بقتش مطروحة بالنسبة لي زي اني استغنى عن أي قرش أبيض ممكن ينفعني في يوم أسود
المهم بقى في كل ده إن أستاذ معتز قال لي إني لازم أحضر بنفسي قدام القاضي في القضية دي تحديداً
ليه يا أستاذ معتز ؟
عشان لازم تحلفي قدام القاضي
أحلف أحلف بإيه ؟
إنك شوفتي دم الحيض ٣ مرات !
نعم ؟ أحلف إني إيه؟
يا دينا هانم ده إجراء شرعي لازم يتم عشان يتحكم لك بمستحقاتك !
إجراء شرعي ؟
هو أنا لسه هتهان تاني يا أستاذ معتز ؟
مش كفاية إني إتطلبت في بيت الطاعة خمس مرات بالشرع !
مش كفاية أخدت حكم نشوز غيابي عشان رافضة ارجع لواحد مش عاوزاه بالشرع !
هي الإجراءات الشرعية دي ما بتهينش غير الستات !
أنا أقف قدام قاضي و أحلف إني شوفت دم الحيض ثلاث مرات عشان آخد حقوقي !
إيه الإشمئزاز ده .
هي الناس اللي كتبت الشرع دي . للدرجة دي شايفينا سلع ؟
للدرجة دي ما عندهومش أي إعتبار لمشاعرنا و كبريائنا و كرامتنا ؟ حتى لخجلنا و خصوصياتنا؟
هو النص التحتاني ده مهم قوي كده في كل حاجة؟
كل حاجة القاضي يشوف إننا نستحقها أو ما نستحقهاش . لازم تكون في النص التحتاني و بالإهانة دي و الرُخص ده؟
معلش يادينا دي حقوقك و لازم تسايري الموجة عشان تاخديها !
هي كل حاجة هاخدها من الشرع لازم تكون بطعم الذل و الظلم ؟
ميراثي . طلاقي . حقوقي .
حتى حضانة ولادي . تروح مني لو قررت أتجوز .
يعني حتى أمومتي . مرتبطة في الشرع بنصي التحتاني!
إهدي يا دينا . إنتي هتكفري !
أنا كافرة بكل شيئ ينتهك خصوصيتي بكل شيئ يهين مشاعري . بكل شيئ يدبح كرامتي .!
القوانين دي لازم تتغير .!
أنا تعبت من الإهانة !
أرجوك يا ريس إنسف منظومة الأحوال الشخصية دي و إبعدها عن الشرع !
إحنا إتوجعنا كتير قوي يا ريس !
إحنا بنتعامل زي الجواري !!!
و كله بسبب الشرع !!!
#الدكتورة_بنت_الباشمهندس
ليست هناك تعليقات :